Jordan Valley Community Health Center Nih A Hmasa Bik Siibawi Cawn Pehzulhtu 2 A Don

Jordan Valley Community Health Center nih ram pumpi “Match Day “ thanhmi ah a hmasa bik sibawi cawnawk 2 a thanhnak thawngin sibawi cawnpiaknak caah a i pekchanmi a fekter.

Springfield, MO – Jordan Valley Community Health Center (JVCHC) nih a Family Medicine Residency Program chungah a hmasa bik sibawi cawnawk 2 cu cawnnak program he an i remh khawh cang ti kha lunglawm tein a thanh. Jordan Valley nih CoxHealth he an i tuahpi ih Southwest Missouri Consortium for Graduate Medical Education (SMC GME) kha an dinh. Hihi sibawi cawnnak sang deuh caah ngandamnak zung le Cox an i tuahpinak ah a biapi tukmi hmasawnnak a si ih, hmun chungah a hmasa bik Sibawi Cawnpiaknak Ngandamnak Zung a dinh. Hi thanhmi cu sibawi cawnnak hmun hna thanh an sinak ram pumpi "Match Day" a simi tuni ah a chuak.

I dilmi 2, Dr. Cole Irwin, DO, le Dr. Hannah Newland, DO, cu hi program he hlawhtling tein an i remh cang ih JVCHC ah an sibawi cawnnak an thawk lai. Cu hmun ah an sibawi cawnnak chungah mah tein tuah cawnnak le tonnun an ngah lai. Kum 3 sung sibawi cawnnak nih a ra lai mi a hramthok ngandamnak zohkhenhtu sibawi hna timhlamnak caah a sunglawi mi cawnnak caan tha hna a pek lai.

“Kan hmasa bik sibawi cawnawk hna don le kan program chapchoh ding cu kan lung a lawm tuk,” tiah Program Director, Dr. Alyssa Easter nih a ti. “Hi sibawi cawnnak cu kan mipi ngandamnak le nunnak tthatnak ah bawmhchanhnak a tuah lai mi thiamnak sang a ngeimi sibawi hna cawnpiak ding kan i pekchannak ah a biapi mi a si.”

JVCHC sibawi cawnnak program cu a ra lai mi kum hna ah a karh vivo lai. 2026 ah sibawi cawnawk 3, 2027 ah 4, le cu hnu kum fatin 4 dang chap ding timhlamnak a um. Hi program nih Missouri chungah sibawi si duhmi hna caah sibawi cawnnak caan tha 12 a tuah lai ih, caan sau tinhmi cu hi cawnpiakmi thiam hna ramkulh chungah umter peng ding a si. The Teaching Health Center Graduate Medical Education Program nih a langhtermi ningin, THCGME in cawn dihmi 56% nih sibawi zohkhenhnak tlamtling tein a ngah lo mi mipi le/asilole thingtlang mipi hna sinah rian an ṭuan ih, an cawnnak hmun in meil 5 chungah rian ṭuan an duh deuh.

"Kan sibawi cawnnak program thar cu Missouri ngandamnak zohkhenhnak kalphung a ra lai mi caan caah le kan mipi chungah a bawmh a herh bikmi hna zohkhenhnak caah a biapi tuk,” tiah CEO, Dr. Matthew Stinson nih a ti. “Sibawi cawnnak caan tha karhter cu kan hmun chung in thiamnak a ngeimi hna ṭhanchoter lawng a si lo, hi sibawi hna kan ramkulh chungah an um peng ding zong kan fianter ih, kan hmunram caan sau ṭhanchonak le harsatnak khan khawhnak ah bawmhchanhnak an tuah lai." 

Match Day cu zeidah a si?
Match Day cu National Resident Matching Program® (NRMP®) a donghnak a si ih ram pumpi sibawi siangngakchia hna caah a biapi mi caan a si. March thla 17 ni, Cawnni ah sibawi cawnnak a dilmi hna nih cawnnak program he an i remh le remh lo an hngalh. A i remh lo mi hna caah NRMP i Supplemental Offer and Acceptance Program® (SOAP®) nih a luak rihmi hmun ngah khawhnak caan tha a pek. Match Day cu 2025 kum March thla 21 ni, Zirtawpni ah a si ih, cu ni ah ram pumpi in a dilmi hna nih anmah he a i remhmi sibawi cawnnak program hna an hngalh.

National Resident Matching Program® (NRMP®) Kong
NRMP® cu United States ah sibawi cawnawk le cawnnak program i remhter kalphung uk ding caah 1952 ah dinhmi, a hlawk ngahnak a tinh lo mi bu a si. Sibawi siangngakchia le sibawi cawnnak program hna cu kalphung fel le ding tein a i remhtertu The Match® kha a zohkhenh. Main Residency Match® lengah, NRMP® nih sibawi thiamnak ah a hleice in ṭhenmi 70 nak tam caah Fellowship Matches zong a tawlrel.

Jordan Valley Community Health Center Kong
Jordan Valley Community Health Center cu southwest Missouri ah minung le chungkhar hna sinah a ṭha le a tlamtlingmi ngandamnak zohkhenhnak pek dingah a i pekchanmi, a hlawk ngahnak a tinh lo mi ngandamnak zohkhenhtu a si. JVCHC nih a sibawi cawnnak program thawngin ngandamnak zohkhenhnak ngah khawhnak ṭhater le hi hmunram ah a ra lai mi ngandamnak thiam hna ṭhanchonak bawmh ding a i pekchannak kha a fekter peng.